భైంసా ప్రాంతీయ ఆసుపత్రిలో జిల్లా వైద్య ఆరోగ్య అధికారి (DMHO) డాక్టర్ రాజేందర్ గారి ఆధ్వర్యంలో 108 EMT దినోత్సవాన్ని ఘనంగా నిర్వహించారు. ఈ సందర్భంగా అత్యవసర వైద్య సేవలు అందించడంలో 108 సిబ్బంది చేస్తున్న కృషిని పలువురు ప్రశంసించారు.
DMHO డాక్టర్ రాజేందర్ మాట్లాడుతూ, 108 అంబులెన్స్ సేవలు అత్యవసర పరిస్థితుల్లో ప్రజలకు ప్రాణాధారంగా నిలుస్తున్నాయని తెలిపారు. పట్టణ, గ్రామీణ ప్రాంతాల్లో ప్రమాదాలు, గుండెపోటు, మెదడు సంబంధిత వ్యాధులు, గర్భిణీ అత్యవసర పరిస్థితుల్లో ఈ సేవలు వేగంగా స్పందించి అనేక ప్రాణాలను కాపాడుతున్నాయని ఆయన పేర్కొన్నారు.
సంఘటనా స్థలంలోనే ప్రాథమిక చికిత్స అందించి, బాధితులను స్థిరపరిచి సమీప ఆసుపత్రులకు తరలించడంలో అత్యవసర వైద్య సిబ్బంది కీలక పాత్ర పోషిస్తున్నారని డాక్టర్ రాజేందర్ వివరించారు. ముఖ్యంగా ప్రమాదాలు జరిగిన వెంటనే సమయానికి చికిత్స అందించడం వల్ల అనేక ప్రాణాలు రక్షించబడుతున్నాయని ఆయన తెలిపారు.
జిల్లాలో గత ఏడాది కాలంలో 31,977 అత్యవసర ఘటనలకు 108 అంబులెన్స్ సేవలు అందించినట్లు 108 EMT లక్ష్మణ్ వెల్లడించారు. ప్రమాద బాధితులు, గర్భిణీలు, గుండె, ఇతర అత్యవసర వ్యాధులతో బాధపడుతున్న వారికి సకాలంలో వైద్య సహాయం అందడం వల్ల వేలాది మంది లబ్ధి పొందారని తెలిపారు.
అత్యవసర కాల్ వచ్చిన వెంటనే సంఘటనా స్థలానికి చేరుకుని అవసరమైన చికిత్స అందించడం తమ బాధ్యతగా భావిస్తున్నామని వైద్య సిబ్బంది తెలిపారు. ప్రజలు అత్యవసర పరిస్థితుల్లో ఆలస్యం చేయకుండా వెంటనే 108 సేవలను సంప్రదించాలని సూచించారు. నిర్వాహక అధికారి జనార్ధన్ కూడా 108 సేవలు ప్రజలకు అత్యంత అవసరమైన సమయంలో ప్రాణాధారంగా నిలుస్తున్నాయని అన్నారు.
